Data by iragazkiak elementuak: December 2024
Nafarroan, KORRIKA, Festaroren eskutik!
"Batu dezagun euskara" (KORRIKA berezia) lana estreinako dute gaur, hilaren 31, gaueko 9:30ean, euren youtube kanalean.
Aurten ere, Festaroko lagunek KORRIKA "sinboliko" bat egin nahi izan dute Nafarroa osoan zehar; KORRIKAren lekukoa hartuta, zona bakoitzean euskararekin zerikusia duten erakundeak edo entitateak"KORRIKA" egiten jarri dituzte. Lekuko barruan mezu bat ere joan da, eta guri, AEK-kooi, hori idazteko aukera eman digute; egon adi!
Ikusi hemen
AEK-k 80 ekitaldi baino gehiago egin ditu, aurten ere euskararen lekukoa, euskaltegien aldeko bultzada, kalean egon dadin
AEK-k 80 ekitaldi baino gehiago egin ditu, aurten ere euskararen lekukoa, euskaltegien aldeko bultzada, kalean egon dadin. Euskal Herriko herrialde guztietan izan dira, eguerdiko 12etan, ekitaldi xumeak, ordu erdikoak, unean uneko osasun-neurrietara zeharo egokituak. Bultza euskaltegiak!-Bultza euskara! izeneko dinamikaren barruan antolatu diren ekitaldiak dira, aurten ere euskalduntze-mugimenduaren garrantzia plazaratzeko. AEKren mezua izan dute ardatz (deskargatu hemendik, irakurri hemen)
• Euskaltegiek mende erditik gorako ibilbidea egin dute, eta, poztasunez, esan behar dugu ondorio emankorrak sortu dituztela; gaur, alde batetik, nabarmendu nahi izan dugu, bereziki, aurten ere euskaltegietan ari diren irakasleen eta ikasleen ahalegina.
• Argi dago oraindik lan handia dugula egiteko: beraz, euskaltegi guztiak dira beharrezko jendarte euskalduna amets badugu. Euskaltegi sendoak behar ditugu, Euskal Herri osoko herritarrei euskara ikasteko aukera emateko baldintza egoki guztiekin. Horretarako, ezinbestean, EAEko, Nafarroako eta Ipar EHko
administrazioetatik bultzada estrategikoa eman behar zaio arloari. Herritarren nahiz mota guztietako eragileen bultzaden ondorioz, agintari politikoak mugiarazi nahi ditugu. Apirilaren amaieran, Bultza euskaltegiak! dinamikaren barruan, gutun bat helaraziko diegu Euskal Herriko administrazio nagusiei, datozen urteetan
euskalduntze-mugimenduak nolako baldintzak izan behar dituen jasota.
• Era berean, Azken urtean bizi izan dugun eta bizi dugun egoera korapilatsuak ez digu utzi euskararen aldeko ekimenik garrantzitsuena aurten egiten. Korrika atzeratu dugu, baina ez dugu bertan behera utzi; eta, gainera, azpimarratu behar dugu oraindik ere nahitaezkoa dela duela 40 urte jaio zen ideia ero eta zoragarri hura gauzatzea. Hortaz, AEKn buru-belarri ari gara lanean datorren urtean 22.KORRIKA egin ahal izateko.
22. KORRIKA inoiz baino beharrezkoagoa izango da, eta guztion guztion bultzada beharko dugu. Ziur gaude babes erraldoia jasoko dugula. Apuntatu data: 2022ko martxoaren 31tik, apirilaren 10era.
ESKERRIK ASKO BULTZADAGATIK, EUSKAL HERRIA!!
Bultza euskaltegiak. Bultza euskara! Egizu ekarpena kanpainak ere zabalik segitzen du. KORRIKA atzeratzeak zuloa eragin du AEKren aurrekontuan, eta zorpetze horri aurre egiteko herritarren sostengua jaso nahi dugu. Ekarpenak AEKren webgunean egin daitezke, hainbat eratan.
Azkenik, mota guztietako eragileekiko lan-ildo amankomun bat ere jorratzen ari gara. Gobernuek eta herritarrek jokatzen duten rolaz gain, eragileek ere paper garrantzitsua dutelako helduen- euskalduntzean.
Abian da Hizkuntza Gutxituen XVIII. Nazioarteko Biltzarra (BAGARANOR) eta AEK/KORRIKAk ere bat egin du ekimenarekin
ICML kongresuaren aurtengo edizioa hasi da, eta Bilbon izatea espero genuen, baina azkenean ICML XVIII online izango da. Gainera, prestaketaren hastapenetan, aurreikusten zen 22. KORRIKAren edizioarekin bat egitea, Biltzarrak parte hartze berezia izatea, KORRIKA Bilboko kaleetatik pasatzen zen bitartean. Azkenean, tamalez, pandemiak guztiz baldintzatu du hasierako asmoa
Hala eta guztiz ere, AEK/KORRIKAren isla izango da egitarauan; batetik, KORRIKAren erakusketa birtuala eta ikus-entzunezkoa kongresuan parte hartuko dutenen esku egongo dira, eta, horrez gain, KORRIKAri buruzko ponentzia bat egongo da.
Igandean, AEK-k 80 ekitaldi baino gehiago egingo ditu, aurten ere euskararen lekukoa, euskaltegien aldeko bultzada, kalean egon dadin
Euskal Herriko herrialde guztietan izango dira, eguerdiko 12etan, ekitaldi xumeak, ordu erdikoak, unean uneko osasun-neurrietara zeharo egokituak eta esan bezala, igandean (martxoaren 28an. Ikusi zerrenda HEMEN.
Bultza euskaltegiak! Bultza euskara! izeneko dinamikaren barruan antolatu diren ekitaldiak dira, aurten ere euskalduntze-mugimenduaren garrantzia plazaratzeko.
AEKren mezua irakurtzeaz gain, giroa berotzeko, bi abesti entzungo dira herri guztietan. Batetik, “Euskal Herrian Euskaraz” abesti ezaguna, eta, bestetik, berariaz egun horretarako sortu den “Lekukoa mingaina” bertso-rapa. Bestalde, herriaren arabera, bestelako ekintzak izango dira: bertsolariak, musikariak...ariko dira, besteak beste.
Bultza euskaltegiak! Bultza euskara! Egizu ekarpena kanpainak ere zabalik segitzen du. KORRIKA atzeratzeak zuloa eragin du AEKren aurrekontuan, eta zorpetze horri aurre egiteko herritarren sostengua jaso nahi da. Ekarpenak hemen egin daitezke, hainbat eratan.
Azkenik, mota guztietako eragileekiko lan-ildo komun bat ere jorratzen ari gara. Gobernuek eta herritarrek jokatzen duten rolaz gain, eragileek ere paper garrantzitsua dutelako helduen-euskalduntzean. Era berean, apirilaren amaieran, Bultza euskaltegiak! dinamikaren barruan, gutun bat helaraziko diegu Euskal Herriko administrazio nagusiei, datozen urteetan euskalduntze-mugimenduak nolako baldintzak izan behar dituen jasota.
Berria egunkariaren eskaintza berezia
Martxoaren 28a baino lehen BERRIAren asteburuetako harpidetza egiten baduzu, ekarpenaren %25 AEKri eta euskaltegiei bideratuko diete. Egin harpidetza orain eta #BultzaEuskaltegiak eta #Bultza Euskara. Izan Berrialaguna eta Bultza Berria!
'Bultza euskaltegiak! Bultza euskara!' dinamika abian, euskalduntze-mugimenduaren garrantzia plazaratzeko
AEKn, Bultza euskaltegiak! Bultza euskara! izeneko dinamika jarriko dugu abian, aurten ere euskalduntze-mugimenduaren garrantzia plazaratzeko.
Euskal Herriko herritarren % 55 erdalduna da. Berdintasunean oinarritutako jendartea amets badugu, argi dago herritar helduen euskalduntzea beharrezkoa dugula, guztion eskubideak bermatzeko zubia delako. Beraz, euskaltegi sendoak behar ditugu; bide onetik goaz, urtero-urtero 45.000 herritarretik gora euskara ikasten ari baitira horietan, baita pandemiak eragindako ikasturte ezohiko honetan ere. Bultza ditzagun euskaltegiak! Bultza dezagun euskara!
Hala eta guztiz ere, arlo horren finantzaketa ez da aski, aurrerapausoak eman diren arren. Esate baterako, AEK Euskal Herri osoan aritzen da; herritarrei euskara ikasteko aukera ematen zaie edonon bizi direlarik ere; horregatik, gaur egun, hiru administrazioetatik (EAE, Nafarroa eta Ipar Euskal Herria) arloari bultzada estrategikoa eman behar zaiolakoan gaude.
Hurrengo hilotan, Bultza euskaltegiak! Bultza euskara! izeneko dinamika jarriko dugu abian, aurten ere euskalduntze-mugimenduaren garrantzia plazaratzeko. Duela 55 urte Rikardo Arregik bidalitako gutun hartan argi islatu zen helduen euskalduntzea ezinbestekoa zela, orduan, euskararen biziberritze osoa lortzeko. Gaur egun, bide oparo eta nekaezina eginda ere (ikerketek diotenez, jendarteak azken hamarkadetan irabazi dituen hiztun berrietatik heren bat euskaltegietatik atera da), bistan da euskaltegiok buru-belarri segitu behar dugula lanean.
Hiru ardatz izango ditu (gehiago irakurri gainean egin klik,eskuinetara):
Gau-eskoletako ikastaldeen arteko argazki lehiaketa
Iparraldean, gau-eskoletako ikastaldeen artean argazki lehiaketa antolatu dute. Apirilean argazki irabazlea ikusteko aukera izango dugu.
Gure euskaltegi eta gau-eskoletan... #EuskaraPraktikoa!!
Errigora: plateretik baratzera!
Plateretik baratzera leloa izanen du 2021eko Nafar hegoaldeko uzta eskutik eskura kanpainak. Martxoaren 4tik 24ra eskatu ahal izango dira olioa eta kontserbak Errigoraren webgunean.
Elikagaiak ekoizteko erak aldatzeko, alda dezagun kontsumitzeko modua. Ohiko esamoldea (baratzetik platerera) atzekoz aurrera jarrita, ohiko kontsumitzailearen ohiko eskemak hankaz gora jarri nahi ditu Errigorak. Izan ere, eserita itxaron ordez, aulkitik altxatu gabe egin dezakegu bidea elikadura-burujabetzara, pentsatzen dugunaren arabera janez. Platerak tokiko uztarekin betez. Eskala txikian ekoitzitako elikagaiak kontsumituz. Produktu agroekologikoen eskaintza handitu dadin, hauen eskaera indartuz.
Asmoa ez da, ordea, maila teorikoan geratzea; praktikan, ekoizpena eskaerara nola moldatzen den erakutsi nahi da. Batetik, kanpaina hau abiatu zenetik, milaka kontsumitzaile arduratsuk bestelako hautuak eginez, ekoizpenaren eremuan eman diren pausuak kontatuz. Bestetik, kanpaina hau erronka gisa planteatuz: hainbat produkturen ekoizpenean muga handiak topatu dira, eta kanpaina honetan horien eskaera indartzen bada, ekoizle eta lur-eremu berriekin mugak gainditzeko elkarlanak bideratzeko gai izanen gara. Hau da, gure lankide, auzokide edo lagunei ulertarazi behar dieguna: gaurko kontsumoaren araberakoa izanen da biharko ekoizpena.
Kalean da martxoko AIZU!
LANIN podcasta entzungai
Ez da LANIN egistamoaz hitz egingo dugun lehendabizikoa aldia. Orain, Oiartzungo lan munduan euskara sustatzeko proiektuan azaldu den ekimen berria aipatu nahi dugu. Izan ere, Oiartzun Irratiarekin elkarlanean, sortutatako podcasta estreinatu da berriki. Aste honetan, hain zuzen ere, Oiartzun Irratiko 'Arguyun' saioan. Lanin egitasmoaren barnean martxan jarritako saioa da, proiektuaren nondik norakoak Oiartzunen zabaltzeko asmoz. Zabalpena handiagoa izan dadin bloga ere sortu dugu, eta bertan podcastaz gain, gaiari lotutako berriak ere igotzen ditugu.
Hemen duzue podcastaren lotura: https://oiartzunlanin.eus/?p=49
Lehen saioan, hizkuntza-kudeaketa zergatik eta zertarako den garrantzitsu azaldu digu Mikel Urdangarinek. 20 urte inguru darama Ahize-AEKn hizkuntza-aholkularitzan, eta Lanin egitasmoan sorreratik ari da lanean.
Hemendik aurrera, podcasta hilero emititzen ahaleginduko gara.
Bultza euskaltegiak! Bultza euskara!
Asteartean, hilaren 23an, prentsaurreko telematiko baten bidez, aurkeztuko dugu abian jarriko dugun dinamika: Bultza euskaltegiak, Bultza euskara!
Ekimena martxoaren 28an burutuko da hainbat lekutan. Gorde eguna!
BULTZA!
Gutuna, helduen euskalduntze-alfabetzatzearen abiapuntuaren 55. urteurrena dela eta
Egunotan gutun bat zabaltzen ari gara, duela 55 urte Rikardo Arregik Euskaltzaindiari bidali zuena aitzakia hartuta. Bertan, Rikardo Arregik euskaldunak alfabetatzeko ekimen bat martxan jar zezaten eskatzen zien. Gutun hura jo izan da 60ko hamarkadako helduen euskalduntze-alfabetatze ekimenaren abiapuntutzat. Beraz, AEKrena berarena ere bai.
22. KORRIKA atzeratu behar izan dugun sasoi honetan, ideia zirraragarri eta ero haren sorreraren urtemuga ere bizi izan dugu, joan den abenduan lehendabiziko KORRIKAren 40. urtebetetzea izan baita; hasierako edizioaren lekukoaren barruan Rikardo Arregiren gutunaren kopia zihoan (azkenean, galdu egin zen arren). 1982ko bigarren KORRIKAn eskutitza berreskuratu, eta Rikardo Arregi bera omendu genuen. AEKren hastapenetan, Euskal Herri osoan guztiz eratu zenean, KORRIKA sortu genuen, euskaltegietako lana sustatzeko eta, halaber, diru-beharra agerian zegoelako.
2022an, 22. KORRIKA egingo dugu, eta ikusten dugu oraino ere guztiz beharrezkoa dela, Rikardo Arregiren ekimenaren hazia nahiz KORRIKA sortu zuten haien izerdia lehortu ez direlako. 55 urte geroago, AEK-k berretsi egin nahi du egun ere Helduen Euskalduntze eta Alfabetatzeak berebiziko garrantzia duela.Horregatik guztiarengatik, 2021. urtean ez gara geldirik egongo: efemeridea aintzat hartzeaz gain, martxoaren 28rako deialdia egingo dugu, hainbat tokitan elkartzeko asmoz. Ekimen horren nondik norakoak aurrerago jakinaraziko ditugu; beraz, laster geure berri izango dituzue.
Gozatu AEKn! Urteko oparia zuretzat!
Zozketa eginda, 5 ikasleri sorpresa polita ematen diegu sasoi honetan. Egunotan bakoitzak otzara bana jaso du; bertan, besteak beste, hauxe aurkituko dute: ELKAR opari txartela (15 euro), Euskaraz bizi nahi dut-osagarriak KOPARIAren eskutik, baita ERRIGORAren eta CASA ECEIZAren produktuak ere. Eskerrik asko ekimen hau aurrera eramaten laguntzeagatik.
Hauek dira saridunak: Ashrhen Avaguian (Baiona), Ruben Ayechu (Pirinioak), Veronica Rodriguez (Santutxu-Bilbo), Julian Fernando Zayas (Arana-Gasteiz), Emerita Carton (Amara-Donostia).
Primeran B2 materiala: bigarren eskuliburua kalean!
HABEk, ELKAR-ek eta AEK-k Primeran B2.2 material didaktikoa plazaratu dute. Honekin Primeran B2 maila egitasmoaren osagai guztiak ikasle eta irakasleen esku jarri ditugu. Izan ere, Primeran B2.1, lehendabiziko liburuxka, 2020ko irailean kaleratu zen.
Ezaugarri berezia du Primeran B2.2 materialak: jardun biko taldeentzat pentsatutako materiala da, aurrez aurreko talde arruntetan ere erabil daitekeena. Izan ere, ikasgelan eta ikasgelatik kanpora gauza daiteke, taldean zein bakarka.10 ikasunitate ditu eta horietako bakoitzak 10 ikastordurako jarduerak eskaintzen ditu.
Ikaslearen liburua da PRIMERAN! B2ren euskarri nagusia. Ikus-entzunezkoen transkripzioak eta erantzun-orriak jasotzen ditu, baita landutako edukien aurkibide zehatza ere. Baliabide eta osagarri guztiak www.primeranb2.ikasbil.eus atarian daude eskuragarri:
Informazio gehiago hemen
Materialaren aurkezpena
Primeran! B2 materialaren berri emateko bi saio eskainiko dira: bata otsailaren 12an eta bestea 19an, eguerdiko 12etan.. AEKren Didaktika taldeko kide eta materialaren egile Maider Barandiaranek eta Aitor Ogizak aurkeztuko dute lana. Ordubete iraungo dute.
Aurretiaz izena eman behar da.
Pirinioetako mintzakide programa abiatu da
2021eko otsailaren 1ean abian jarri da Pirinioetako mintzakide egitasmoa. Datozen asteotan aurkezpen-bilerak egingo dira programaren xehetasunak emateko eta lehenengo mintzataldeak osatzeko. Ondokoak dira programaren sustatzaileak: Auritz, Artzibar, Erroibar, Luzaide, Orreaga eta Agoizko udalak; Aezkoako Batzarre Nagusia; eta Pirinioetako AEK euskaltegia.
Dagoeneko, izena emateko aukera zabalik dago udaletxe guztietan, AEKren euskaltegian eta praktikatu.eus webgunean (bete galdetegia).
Informazio gehiago nahi izatekotan, bidali whatsappa telefono honetara: 607 642 078
Otsaileko aldizkaria musukoa jantzita dator
Kalean da hilabete honetako AIZU! aldizkaria eta gure ikasleek egunotan doan jasoko dute euskaltegian. Harpidetza egin nahi duenak ere aukera ederra dauka. Bestela, kioskoan eskuratzea dago.
Azalean eta elkarrizketa nagusiaren protagonista Miren Basaras dugu, mikrobiologiako irakasle titularra EHUn. Joseba Larretxea 'Josevinsky' marrazkilariarekin ere mintzatu dira arin-arin atalean AIZU!ko lagunak.
Erreportajeak, lehiaketak, komikiak... albiste laburrak eta gehiago topatuko dituzu. Euskara ikaslea edo irakaslea bazara, baliagarria izango zaizu AIZU!. Izan ere, euskaraz irakurtzeko ohiturarik ez dutenei begira idatzita dago.
On egin!!
“Adizkinator”, Euskal aditzak jokatu eta bilatzeko aplikazioa martxan
Adizkinator aurkeztu da, euskaldunei eta euskalduntze prozesuan daudenei zuzendutako doako aplikazioa.
Euskaltzaindiak euskara baturako onartu dituen adizki laguntzaile eta trinko guztien modu neutroak ez ezik, hikako forma alokutiboak ere eskaintzen ditu. Erabiltzaileek aditzak jokatu eta bilatzeko aukera izango dute modu erraz eta azkarrean.
Egilea Ander Herranz euskara irakaslea da eta Uribe Kostako AEKn egiten du lan. Tresna ikasleen beharrei erantzuteko sortu zuen 2020an, eta 2021ean argitaratu du. Anderrek adierazi duenez, "Helburua da bilatu nahi den aditzaren forma berehalakotasun handiz lortzea. Horretarako, adizki guzti-guztiak (hikako alokutiboak eta trinkoak barne) bildu dira eta bilaketa bidea erraztu da terminologia egokituz"
Deskargatu aplikazioa, doan, Google Play dendatik.
"Mundu berri bat guztiontzat" lana aurkeztu du Bizipoza Elkarteak
Larunbatean, urtarrilaren 23an, Bizipoza elkarteak "MUNDU BERRI BAT GUZTIONTZAT" lanaren aurkezpen ekitaldia egin zuen.
Elkarteen eguneroko errealitateak eta trasmititzen dituzten baloreak kantua, irudia eta hitzen bidez bildu dituzte lanean, 12 kantu eta 11 bideoklip dira. Eskuratu nahi?
AEK-k babesa eman nahi dio Bizipoza Elkarteari eta ekitaldian, Artezkaritza kide Aize Otañok hartu zuen parte.
Argazkia: Asier Arrieta (mila esker, Asier!)
EAEn, ikasleak joan daitezke bizitoki duten udalerrian ez dagoen euskaltegira? ¿Puede el alumnado acudir a un euskaltegi que no esté en el municipio de residencia en la CAV?
2021eko urtarrilaren 26 · 26 de enero de 2021.
Berez, bai, irakasleak berak ematen dien dokumentuaren bidez egiataztuta. Euskaltegian galdetu, zalantzarik edukiz gero (Euskal Autonomia Erkidegoan)
Azken erabakien gaineko ohiko galderei ematen dieten azken eguneraketan, 70. galdera euskaltegien gainekoa da eta ikasleak euskaltegitara joan daitezkeela jaso dute.
"70. Joan naiteke ikastera bizitoki dugun udalerrian ez dagoen zentro, akademia edo euskaltegi batera? Nola justifikatuko dut?
Egoera hori berariaz jasota dago urriaren 25eko 926/2020 Errege Dekretuaren 6.1.cartikuluan, hau da, Unibertsitateetara, ikastetxeetara eta ikastetxeetara joatea, hezkuntza-eskolak barne. Baliozkoa eta nahikoa den edozein dokumenturen bidez egiaztatu ahal izango da"
-------------------------------------------------------------------------------------------------------------------------------------------------------------------------------------------------------------------------------
En realidad, sí, verificado mediante el documento que les facilita el propio profesorado. Pregunte en el euskaltegi si tiene alguna duda (En la Comunidad Autonoma Vasca)
En la última actualización que dan a las preguntas habituales, la pregunta 70 es sobre los euskaltegis y han recogido que los alumnos y alumnas pueden acudir a los euskaltegis.
"70. ¿Puedo ir a estudiar a un centro, academia o euskaltegi que no esté en el municipio de residencia? ¿Cómo voy a justificarlo?
Esta situación se recoge expresamente en el artículo 6.1.c. del Real Decreto 926/2020, de 25 de octubre, es decir, la asistencia a universidades, centros educativos y centros educativos, incluidas las escuelas educativas. Podrá acreditarse mediante cualquier documento válido y suficiente "
Zuzentasunari, egokitasunari eta naturaltasunari buruzko saioak
UEUk eta Oihaneder Euskararen Etxeak, euskara estandarraren ahoskerarekin eta, oro har, ahozkotasunarekin zerikusia duten bestelako aldagaiekin (azentua, intonazioa, euskal doinua...) esperimentatzeko laborategia jarriko dute martxan. Saioak aurrez aurrekoak izango dira Oihaneder-en eta izena emateko epea dagoeneko irekita dago hemen; martxoaren 12ra arte. BETETA!!!
Egitaraua:
- Mahaingurua (otsailak 24). Euskara lanabes duten hiru profesionalen hausnarketak entzungo ditugu: Ilaski Serrano, Franck Dolosor eta Edurne Azkarate.
- Hiru saio trinko larunbat goizetan (martxoak 13 /27 eta apirilak 17):
- Lehenik gaiari lotutako adituen ekarpena jasoko da: Lourdes Oñederra, Oroitz Jauregi, Kike Amonarriz eta Julia Marin;
- Ondoren esperimentatzeari ekingo zaio laborategian: bideratzaile izango ditugu Imanol Miranda, Jon Sanchez eta Alba Fernandez.
Laguntzaileak: AEK eta IKA euskaltegiak